மங்கை மார்பகம் வாகு வாய்சுனை
வந்த வாதரும் வால்விழி
செங்கை சீர்வளை தேடு சிற்றிடை
திங்க டேர்முகஞ் செவ்விதழ்
தொங்கு தூகுழ றுஞ்சு சோர்வழி
தொய்வில் சுந்தரத் தோள்களுந்
தங்கு தாழ்மனஞ் சங்கு சக்கர
சார்ங்கன் றாளிணை சாருமே
மங்கை மார்பகம் - மங்கையினது மார்பகத்திலும்
வாகு வாய்சுனை - அவளது அழகு மிகுந்த சுனை போன்ற வாயிலும்
வந்து அவா தரும் வால் விழி - தானாகவே வந்து பார்ப்பவர்கள் கண்ணில் ஆசையை ஊட்டும் ஒளி பொருந்திய அவள் விழியிலும்
செம் கை சீர் வளை - சீரான வளையள் அணிந்த செம்மையான கைகளிலும்
தேடு சில் இடை - தேடும்படியாக உள்ள சின்ன இடையிலும்
திங்கள் தேர் முகம் - சந்திரன் போன்ற தேர்ந்த முக அமைப்பிலும்
செ இதழ் - சிவந்த நிற இதழ்களிலும்
தொங்கு தூ குழல் - நீளம் மற்றும் தூய்மை பொருந்திய தொங்கும் படியான உள்ள முடியிலும்
துஞ்சு சோர்வு அழி - தூக்கத்தையும் சோர்வையும் அழிக்க வல்ல
தொய்வு இல் சுந்தர தோள்களும் - தளர்ச்சி அடையாத அழகிய தோள்களிலும்
தங்கு தாழ் மனம் - சிந்தையின் ஊடு என்றும் தங்கிக் கொண்டு இருக்கின்ற எனது தாழ்வான மனமானது
சங்கு சக்கர சார்ங்கன் - சங்கு சக்கரமும் சார்ங்கம் என்னும் வில்லும் ஏந்திய திருமாலின்
தாளிணை சாருமே - இரு திருவடிகளை சார்ந்து உய்வு பெறுமோ?
கருத்துகள் இல்லை:
கருத்துரையிடுக