எவ்வாய் இன்னிசை வெண்பா (செவ்வாயிற் செவ்வேள்)

 எவ்வா யணுகினுஞ் செவ்வேளைச் சேரலா

மெவ்வா யுரைப்பினு மேற்றருள்வான் மந்திரமா

யொவ்வா முறையில்லை யோத லொழியாதே

வெவ்வினைக்கு வேலை யிலை

செல்வழியா சிகரமா - நேரிசை ஆசிரியப்பா

வியர்வை சிந்தி மெய்தீர வருத்தி 

யுயர்திகழ் சிகரத் தடைத லொன்றே 

யிலக்கெனக் கருதி யிழந்தனம் பலநா

ளலர்மலர் பூத்த தாங்கு காணிலை 

மலைவழி யருவி மஞ்சன மாடிலை 

யிறைதரு மியல்பினை யிழந்தனை நெஞ்சே 

பாரிடை வாழ்வும் பாழோ  

சேர்விடம் விடுத்துச் செல்வழி காணே 

சிவன் தந்த தமிழ் குறள்வெண் செந்துறை

வற்றா வூற்றா வளத்தை வழங்குங்

குற்றா லத்தான் கொடுத்த தமிழே

மூவடி குறள் வெண் செந்துறை (அடியார் மற்றும் அடியார்க்கடியாரை வியத்தல்)

மூவடி கேட்டு முற்று மளந்தான் 

சேவடி விழைவரைச் சேர்வ மியாமே 

குறள் வெண் செந்துறை

 தேர்த லென்றொரு தேரா நிகழ்வை 

ஓர்தல் வேண்டா வொழிவாங் காலே 

அரவணை (இராம நவமிப் பா)

அரவணை யறிதுயி றிருவள ருரத்தான் 

இரவியின் வழிவர விருகையை மறைத்தான் 

குறள் வெண்செந்துறை

சென்றதை விட்டுச் சிந்தையில் வருவதை

நன்றெதிர் கொள்வார் வென்றிருப் பாரே 

கால மறிந்து களத்தி னிறங்க 

ஞால நல்கு நமக்குத் துணையே 

அமையும் பொழுதை யணைத்துச் செல்ல 

விமயஞ் செல்வ தெளிதென் றறியே 

உமையொரு பாகன் ஈறுமுதலித் தொடை வெண்பா

 உமையொரு பாகன் உகந்தருண் மைந்தா 

சுமையிரு தோளுஞ் சுமந்து -னமைவிட

நோக்கி யலையலையா நோற்று வருவார்தம்

வாக்கிற் கிசைவாய் மகிழ்ந்து 

நடைப்பயணம் ஈறுமுதலித் தொடை வெண்பாக்கள்

நடைப்பயண மேற்கொள்ள நல்லபயன் கிட்டு

மிடைக்கொழுப்பு நீங்கு மிதமா - யடைப்பின்றிச்

செங்குருதி யோடு மிதயஞ் சிறந்தியங்கு

மங்கா தொளிரு மதி 

இயல்பிழந்தால் வெண்பா

இயல்பிழந்தா லில்லை யெவருக்கும் வாழ்வு 

கயல்பழிக்குங் கண்ணா ரெழிலீ - செயல்பல

செய்துசீர் வாழ்ந்த சமூகஞ் செயற்கையென்னும்

பொய்துதிக்கப் போய்மாண்ட வாறு 

நிழல்கனி வெண்பா

நிழல்கனி வேர்தந்து நெடுங்கிளைவீ  டாக்கி

யழல்கொண்டு மட்டமு தாக்கு - மெழில்மிகு

நற்றமிழ் நாட நலஞ்சேர் மரமென்ன

மற்றவர்க்காய் வாழ்வதுவே வாழ்வு

சாற்றமுது வெண்பா

சாற்றமுதுஞ் சோறுங் கறியமுதுஞ் சார்ந்திருப்பார்

மாற்றமுதைக் கொள்வரோ வாய்ப்பிருந்து - மேற்றமிகு

தாய்மொழியின் மேன்மைநிலை தாந்தெளிய வேற்றவரின்

வாய்மொழிசொல் சார்வதுமென் மாண்பு

வீடுபெற வெண்பா

 வீடுபெற வேண்டினும் வாழ்வை விழையினுந்

தேடியருள் வள்ளிமலைச் சீருரைப்போம் - வேடர்

மடந்தை யுவந்து மணந்த கடம்ப

னடந்த சிலம்பை நயந்து 

ஆலாலம் வெண்பா

 ஆலால முண்டா னலுதித் தடைந்தாறு

வேலாலே வென்றான் விதிசிறைத்தான் - பாலாழி

பாம்பணையான் கண்டோன்று பாவை மணமுடித்தான்

சாம்பிணியைப் போக்குமவன் றாள்

அரியருளை நாடி வெண்பா

அரியருளை நாடி  யழுத குருகூர்க்

குருவருளை நாடிக் குறையி னொருகூறு

மண்டாது மண்வாழ வந்தாரி னம்பாவை 

விண்டா ருளம்வாழும் விண் 

குருபத்தி வெண்பா

குருபத்தி கொண்டாள் கொடுத்த கனியை

யரிபற்றி யன்றுவந் துண்டான் - குருபத்திக் 

கேற்றமரி பத்தியின்மே லென்று தெளிவுறச்

சாற்றச் சவரியே சான்று 

கனியுண்டு வெண்பா

கனியுண்டு தந்தாள் கனிவான பத்திக் 

கினிதுண் டிசைந்தா னிறைவன் - மனதண்டா

தாணவத்தை யாடவத்தி னாறகற்று தூயருக்கு 

மாணளிக்க நாவிசைக்கும்  வான்  

உறக்கத்தும் வெண்பா

உறக்கத்து முன்பே ருரைக்கின்றாள் பேதை 

மறக்க வழியின்றி மாலி - லுறங்குதியோ 

பாலாழி பாம்பணையு மாலேயுன் பித்தையிவ

ணூலாக நொந்துழலல் கண்டு 

காலாட்படையாகும் கட்டளைக் கலித்துறை

 காலாட் படையாகும் கட்டக் களியின் உயிரனைய 

மாலாட் படுத்தும் மனது மயங்கிப் பலகணக்கில்

தாலாட்டுப் போன்றெளி தன்றே சமனிலை காத்திருத்தல் 

வேலட்டு மாயும் அரசியோ தேரோ விதிவகையே

வாழ்வை நேரிசை பஃறொடை வெண்பா

 வாழ்வைத் தொலைத்து வளரப் பொருளீட்ட

றாழ்வைத் தரவிருக்கச் சார்வேனோ வூழ்வினையா

னிற்கும் பொருளதுவே நிற்குமெனுஞ் சான்றோர்சொல்

கற்கும்  வழக்குக் கரந்ததுவோ பொற்குவியல்

வீணா மொருநா ளதனான் மெலிந்துவரும்

வாணாண் முடியுமுனே மைவளருங் காணாக 

கண்டத்தர் காறொழலே நன்று

சூரன்வீழ சந்த விருத்தம்

 சூரன்வீழ வேலெறிந்த தோகைநாதன் வீரமோ

மாரன்வீழ வடிவுடைத்த மாலுணர்த்து கோலமோ

பாரின்வீழ்ந்த வுயிர்களுய்யப் பற்றறுக்குங் கருணையோ

வோரின்வாழ்வி லோங்குமத்த மூப்பிலாத மூலனே 

சூரனை வெண்பா

 சூரனை வீழ்த்திச் சுரருலுக மீடரப்

போரினிற் புன்னகைத்த வென்றியான் - மாரனை

வீழ்த்தும் வடிவுடைய வேலன் மயலதனி

லாழ்த்த வணங்கிவளை யாள்  

யாப்பறியா நேரிசை பஃறொடை வெண்பா

யாப்பறியா தேங்க வியமான னாட்கொண்டான் 

மூப்பறியா தாக முடிவெடுத்தாற்  காப்பவனே 

செந்தமிழ்ப் பாட்டிற் றிளைக்குந் திருமருகன் 

சொந்தமென் றான துணிவுளதே வந்தகன 

வாட்கில்லை யாவதிங் கொன்று 

வீரா வெண்பா

 வீரா பிரசன்ன வேங்கடே சன்மருகா 

சூரா சுடர்வேலா சுந்தரா -நேரில் 

குணபரதக் கண்டா குணவாள் குமாரா 

கணேசற் கிளையென்றே கூறு  

ஓதம் வெண்பா (கரப்பு)

 ஓதம் பணிதுயில்வா னும்பர்நல மோயாது

சூதாண்டு நாட்டுவான் றூமலரா ணாதன்

கரிதுயரைச் சக்கரத்துக் காத்தருளு நீணா

வரவுயர்கூக் கையே சரண்

வாலைசேலை சந்த விருத்தம்

 வாலைசேலை நீலமூட ஞாலமாளு நாதனின்

மாலையாளும் விழிமறைந்து வேலைவண்ண னெண்ணமே

கோலமாளு நீலவானின் மேனியென்ன நின்றதோ

மாலையாளு நிறைமதிக்கும் வாலைவண்ண மல்லவே

நதியாடி நேரிசை பஃறொடை வெண்பா

நதியாடி வெங்கதிரோன் றோன்றுதிசை நாடித்

துதிபாடி நாளைத் தொடங்க விதியாளு

மாற்ற லுடற்கமையு மான்ற மதியமையு

நாற்றிசையும் போற்று நடையமையு மேற்ற

மிறங்கா தினிதமையும் வாழ்வு

கான்சென்று பஃறொடை வெண்பா

கான்சென்று கேளிக்கை காண வமர்ந்தூர்தி

வான்சென்று முட்டு மரத்திடை மான்சென்

றடையும் வழித்தடத் தாய்ந்து பதுங்கி

யுடைய சமையம்பார்த் தோங்கி விடையறியா 

வீழ விரைபாயும் வேங்கை பலகூட்டம்

வாழ்வ தறிந்தும் மடமையாற் கீழிறங்கிக்

காணொளி செய்து கடைநாளை யீர்ப்பார்க

ளாணவத்தான் மைந்தனை யச்சுறுத்தி வாணாளைத்

தூண்பிளந்த சிங்கத் திரையாச் சுடரொழிந்த

மாண்பிலா மூடன் வகை

இளவேனில் பஃறொடை வெண்பா

குயிலினங்கள் கோது கலமாகக் கூவு

மயினடிக்குங் காட்டின் மலர்மலரு மீளு

மயலிடம் பேர்ந்த வணிபறவைக் கூட்ட 

மயன்மிக்க பல்லுயிர்கள் வாஞ்சையுடன் சேரு 

மியற்கையெழி லோங்கு மிணையில்லாக் காலம்

வியனிள வேனிலே வா

ஓங்கு மலர் குறள் வெண்பா

 ஓங்குமலர்ச் செம்பாத மோச்ச ரவணங்கு 

தாங்குபவர்க் காசானைச் சாற்று 

செவ்வேடன் வெண்பா (செவ்வாயிற் செவ்வேள்)

 செவ்வேடன் சீர்த்தியைச் செந்திமிழாற் செப்பற்குச்

செவ்வேடன் செவ்வாயாற் சீரருளச் - செவ்வேடாம்

வாயலருஞ் சொல்லெல்லா மாற்றறியா மாந்தர்க்கும்

வாயலரும் வாயலரா மைக்கு 

அரவு அணைக்கும் பஃறொடை வெண்பா

அரவணைக்கும் வான்மதிக் கௌடதத்தைத் தேர்ந்து 

தரவிழைவா ரிந்நாள் சரீரந் துலக்கி 

யொருமனத்து மந்திர முச்சரித்து மீண்டு

மிரவனைத்தி னாண்மை யிகல்வென் றடைய

வரவணைத்துக் காப்பா ரரண் 

மறைமதி பஃறொடை வெண்பா

மறைமதி யான மணவாழ்வை நொந்து 

பிறைமதியா மாற்றப் பிரானிடம் வேண்ட

நிறைமதியா மாற்றி நிமலன்றர வந்த 

விறைவனையே யெட்டுணையு மெண்ணா துழன்று 

சிறைவாழ்விற் சிக்கிச் சிதைந்துநிற் போர்க்கு

நிறைதேன் மலர்மேன்மோ கிக்கு ஞிமிறு

முறைமறந்து தல்லாடி மூடிதழின் மூழ்கி

மறைந்துபோம் வான்மீனோ வாழ்வு 

வாசம் மிகு சிந்தியல் வெண்பா

வாசமிகு மல்லிகையை மாதுமுடி சூட்டுமதித் 

தேசமிகு தேவி சிவையொளிர வீசற்கு

மேமதரு மாலைப் பொழுது 

மயக்குயர் சிந்தியல் வெண்பா

 மயக்குயர் விக்கும் வனப்புணர் விக்குந்

தயக்ககற்றிச் சேர்க்குஞ் சனத்தை நயத்தலுக்கே

ஞாலநல்கு மாலைப் பொழுது

மாலைப் பொழுது சிந்தியல் வெண்பா

தினத்திற் பணியாழச் சிந்தனை செல்லு

மனைத்து மடங்கு மிராவு வனப்புயர்

மாலையே வையத் துகப்பு