கனகவேத கலிப்பா ( தமிழ்ப்புத்தாண்டு)

கனகவேத கோடதூது கலியகற்று கேசவா
சனகமாது மனதையாளு மதிமயக்கி ராகவா
செனனமான புதியவாண்டை யினிதழைக்க வாழ்விலே
யுனதுதாளை மதியமர்த்தித் தமிழுரைத்தல் கோலமே  

பையரவம் கலி விருத்தம்

பையரவந் துயில்பவனோ வுய்யவரந் தந்துவப்பான்
மெய்யரவம் பூண்பவனோ செய்யவர மெளிதளிப்பான்
தையலுமை வேறந்த செய்யவளின் மகள்கேள்வன்
நையவருந் துயர்களையும் பொய்யெனவே சேர்த்தழிப்பான்

தேர்கொண்ட விருத்தம்

 தேர்கொண்ட விசயற்குக் கொடியானாய் 

      வால்கொண் டிலங்கைக்குத் தீவைத்தாய்

வார்கொண்ட திருமகளைக் காண்பதற்கே

     வான்கொண்ட பாதையினைத் தேர்ந்தெடுத்தாய்ப்

பார்கொண் டிராமகாதை பரப்பிடவே

     பேர்கொண்ட வைகுந்தநீ வேண்டிலையே

சீர்கொண்ட ஸ்ரீராம னாமமொன்றே

    நீர்கொண்ட மீனைப் போற் சுவாசித்தாய் 

 

தேவசேனை விருத்தம்

 தேவசேனை நாதனின் றிருமணத்துக் கோலமோ

      சீதைராமன் சேர்ந்திடுந் திருமணத்துக் கோலமோ

பாவைசெய்த பைங்கிளி பதியடைந்த கோலமோ

      பூசைசெய்த பார்வதி பதியடைந்த கோலமோ

பூவமர்ந்த பாவையுந் திருவரங்க நாதனும்

     புன்சிரிப்புப் பூத்திட மருவுகின்ற கோலமோ

சேவைகாண வுற்றதே திருவளித்த பேறென

    சீர்விளங்கு பங்குனி யுத்திரத்தை யேத்துவாம் 

 

பற்றுகின்ற கலி விருத்தம்

பற்றுகின்ற பற்றைநீக்கிக் குற்றமற்ற பற்றினை
யெற்றுநானும் பற்றிநிற்க வெற்றயன்ற சுற்றினிற்
குற்றமற்ற கொற்றிபெற்ற வெற்றிவேலைப் பற்றிடு
கற்றுவந்து கொற்ற(ங்)கொள்ள வெற்றுபெற்ற பெற்றியே 

பராசக்தி துதி விருத்தம்

 1.

நாடுவிட்டு நாடுசேர்ந்து மாடுசேர்க்கு மாந்தரோ

யாடுவெட்டி வேள்விசெய்யு மாறுபற்று மாந்தரோ

கூடுவிட்டு கூடுபாயுஞ் சித்தறிந்த மாந்தரோ

வீடுபற்ற வேண்டுமென்ற விழைவளிப்ப ளிறைவியே

 

ஓயாமல் விருத்தம் (செவ்வாயிற் செவ்வேள்)

ஓயாம லுழல்வதற்கு வழிபலவா முலகெங்கு
     முன்னாமஞ் சொல்வதற்கோ வுணர்வில்லை முன்பெல்லா
நாயாக வலைந்தேனை நாட்டம்பல கொண்டேனைத்
      தானாக வந்தாண்டு நல்வழியி லமர்த்தினையே
தோயாமற் தோயமேற் றாமரைபோல் வாழ்வதற்குத்
      தூமலராண் மருகோனே வுனையன்றி யாருரைப்பார்
சேயோனை வாயாரச் செந்தமிழாற் செப்பிடவே
     சிறியேனை வைத்தவனைச் சாந்துணையு மறவேனே