தோட்டை கட்டளைக் கலித்துறை

தோட்டை மதியாக்கித் தொண்டனைக் காப்பாள் துணையிருந்தாற்
கூட்டைத் திருவாழுங் கோவிலா யாக்கலாங் கூற்றவனின்
ஏட்டை யழித்தாண் டிளமை நிலைக்கும் வழியடைந்து
காட்டை யடையாது காலம் வசமாகக் கைவருமே

 

வென்றி கலி விருத்தம்

வென்றி வேண்டியே வெந்தழ லாகிறோங்
குன்றி நாளுமே கூற்றிடஞ் செல்கிறோங்
கொன்றை யார்சடைக் கூத்தனின் பாதமே
மன்று சேர்ந்தடை யெண்ணமென் றாளுமோ

ஆறுமுகம் வெண்பா ( செவ்வாயிற் செவ்வேள்)

ஆறுமுகங் கொண்டருள வானைமுகன் றம்பியுண்
டேறுமுகந் தானே யெமக்கென்று - நூறுமுகம்
போதாது கந்தன் புகழுரைக்க வென்றாலு
மோதாம லோய்ந்திடுமோ நாள்

வீடுவிட்டு கலிவிருத்தம்

 

வீடுவிட்டு வேலைதேடித் தூரதேசஞ் செல்லலாம்

பாடுபட்டு வேறுபட்ட செல்வநன்கு சேர்க்கலாங்

கூடுவிட்டுச் செல்லுநேரங் கொண்டுசெல்லக் கூடுமோ

வீடுபற்ற விமலன்பாத மின்றுபற்றி யுய்மினே

 

குழந்தை விருத்தம்

குழந்தைநீ குமரிநீ குலங்காக்குந் தாயுநீ

        குளிருநீ வெயிலுநீ கார்பொழியு மழையுநீ

யழுந்து வினைதீர்க்கு மமுதுநீ யழகிநீ

       யடைவுநீ யசைவுநீ யசைவறியா விசையுநீ

யொழுங்குநீ யுணர்வுநீ யுணர்வறியா மூலநீ

       யுயர்வுநீ யுதிர்வுநீ யுருவமைக்கு முமையுநீ

கொழுந்துநீ பழமுநீ குணங்கடந்த வாதிநீ

       விழுந்துனையே நாளுந்தொழ விருப்ப மருள்வாயே

 

மாதுளை (சிலேடை வெண்பா) - முருகனுக்கும் அம்பாளுக்கும்

மாதுளை  வண்ண வடிவேலா வாழ்வளிக்கு
நாதியற்று நிற்போர்க்கு நல்லருளாய்த் - தீதொழிக்கு
மாறுமாறு நான்கு மணிநிற்குங் காத்தருளச்
சீறுமாறின் சேய்நேராந் தாய்க்கு

சிவபூமி கட்டலைக் கலித்துறை

 

சிவபூமி சென்று திருக்கோயில் கண்டு தெளிந்தனமே

நவனீதக் கண்ண னதிபாலக் கந்த னயனங்குளிர்

பவரோகந் தீர்க்கும் பராசத்தி யன்னை புதல்வனுடன்

கவியாஞ்ச நேயன் கதிசீதை ராமன் கழறொழுதே

#கட்டளைக்கலித்துறை

 

அறுசமயம் வெண்பா

 

அறுசமயங் கற்றறிந்து கண்டுணர்ந் தாற்றை

யுறுசமயம் யாதென் றுரைத்தான் - இறுசமயங்

காக்குங் கடவுளே காப்பென் றுணர்த்தவந்தான்

வாக்கான் மழிசைப் பிரான்

#வெண்பா

 

ஹனுமான் விருத்தம்

 

வேலைதாண்டி சீதைகாண வேண்டிசென்ற சேவகன்

வெற்படைந்தி லங்கைவந்து நோக்கியிங்கு நின்றனன்

சோலைசென்ற சோககானஞ் சேருமுன்னர் நின்றனன்

சோர்வடைந்த தேவிகண்டு தேவன்மோதி ரந்தர

வாலைநன்று யர்த்திவைத்து தன்னிருக்கை செய்திடச்

ஜ்வாலைகொண்டு தென்னிலங்கை வெந்தழற்பொ சுங்கிடக்

காலைவென்ற ராமபத்தன் கோவினின்ற ஊரிதே

காணயென்றுந் தோல்வியில்லை வெற்றிமீது வெற்றியே

 

நிலத்தினில் சீதையம்மன் விருத்தம்

 

சீதையம்மன் விருத்தம்

நிலத்தினி லுதித்து நிலத்தினின் மறைவா

ணிசிப்பக லகத்த னினைப்பினி லுறைவா

ணெருபென செருக்க ணரக்கனை யெரிக்க விருந்தாலுஞ்

சலத்தினை விழிக்குள் வெளத்தென பெருக்கந்

தனித்துயர் தனக்குஞ் சகித்திரு விருப்பந்

தலைக்கர மிருக்குந் தனிச்சிலை விழுப்பங் குறையாது

வலத்தினி லிருக்குந் திருப்பொலி மகட்கும்

மருப்பொடு முகுந்த னுயர்த்திடு மகட்கு

மிணைத்தொரு மனித்த வுருத்தரு விழைவாலே

தலத்தினி லுறைந்து வளிச்சுதன் பதித்த

தடத்தினை யுடைத்த விசும்பன நிறத்தா

னிலக்குவ னொடிணைந்த விலங்கையின் மலைக்க ணொளிர்வோளே

 

வேடந் தரித்து கட்டளைக் கலித்துறை

வேடந் தரித்து விளையாடி யன்பர் வினையறுக்கு
மோடு நதிபோ லுடனுக் குடனே வரமளிக்குந்
தேடுந் திருமா றிசைமுகன் காணாத் திகழொளியா
யாடு மரச னமர்திரு வாரூ ரரியணையே

வேதம் விருத்தம்

வேதந் தமிழ்செய்த மாறன் 

      வேலை கடந்தாண்ட தூதன்
 

மோதும் பகைபோக்கு நேமி 

      யோகத் தமர்ந்தாளு சிங்கஞ்
 

சீதை யிளையனோடி ராமன் 

           சீதத் திருவாழு மார்பன்
 

பாதந் தொழும்பேறைப் பெற்றேம் 

                பாவம் பொடியாகு மன்றே

 

அறுசீர் விருத்தம்

மறையோது விருத்தம்

 மறையோது மன்பர்க்கு மறைபொருளு நீயே 

                மதிகொஞ்சு மன்புக்கு மதிகாரி நீயே

குறையேது மெங்கட்குக் கிடையாது தாயே 

          குறைதீர்க்கு முன்குமரன் கொடுத்துவைத் தாயே
 

முறையேது நாமறியோ முனையேத்தத் தாயே 

          மூலத்தின் கனலாக வொளிந்துறங்கு தாயே
 

பறைவேண்டும் பத்தர்க்குப் பணிவளிக்குந் தாயே 

           பரைவேண்டும் பத்தர்க்குப் பரமானாய் நீயே

 

-எண்சீர் விருத்தம்

அன்பிலாத கலிவிருத்தம்

நூறேசு வெண்பா

நூறேசு செய்தா னுடங்க வுடலிரு
கூறாகச் செய்தான் குரைக்கழலை - மாறாது
பற்று மடியார்க்குப் பற்றாதே யிவ்வுலகிற்
குற்றங் குறையென்றுஞ் சிற்று 

காத்திருந்தால் பாவை

 

காத்திருந்தாற் காணலாங் கைத்தொழுதால் வாழலாம்

யாத்திரைகள் போகலாம் யானழியக் கூடலாம்

மாத்திரைக ளின்றியே மண்ணுலகில் வாழலாம்

நாத்திரங்கள் மேன்மைபெற ஞாலத்தை யாளலாஞ்

சாத்திரங்க ளோதலாஞ் சார்ந்தவரைச் சேரலா

மாத்திரங்கள் வீழ்ச்சியுற வன்புடைத்து வாழலாம்

பூத்திருந்த செங்கமல நேத்திரங்கள் காணவே

பாத்திரங்கொள் சீவனாம் பாங்கேலோ ரெம்பாவாய்

 

பொய்யுண்ட வெண்பா (செவ்வாயிற் செவ்வேள்)

பொய்யுண்ட மெய்யுடைத்தும் புங்கவனைப் பாடவைத்
துய்வுண் டெனவுரைத்தா னாயேற்கு - மையுண்ட
கண்டத்தர் மைந்தனன்றோ கந்தையன் செய்தபிழை
கண்டிப்பான் கைவிடான் காண்

 

வேத நான்கின் கலி விருத்தம்

வேதநான்கி னந்தங்கூட சொல்லலொணாத மெய்ப்பொரு 

ணாதவிந்து தத்துவத்தி னாதனான மெய்ப்பொரு

ணாதியற்ற வாக்களுய்ய ஞாலந்தோன்று மெய்ப்பொரு 

ளோதவேலன் பெயரிருக்கக் குற்றம்பற்று மாசொலே

நீர்வண்ணன் கட்டளைக் கலித்துறை

நீர்வண்ண னாம னினைவெல்லா நிற்க நிலையருளிக்
கார்வண்ணன் காட்சி  கனவிலுங் காணக் கதியருளித்
தார்வண்ணத் தண்டுழாய் மார்பன் விலகாத் திருவுடையா
னார்வண்ண னாட நமக்கரு ணல்கு நிகரிலியே 

 

வாலைக் குமரி வெண்பா

வாலைக் குமரி வடவழகி செம்பாக்கப்
பாலா திரிபுர சுந்தரி - ஞாலத்
தரசி யரசர்க் கரசி தருணி
வரிசையாய்க் காணவே கண்

 

சிரத்தை வெண்பா

 

சிரத்தை யுடனே கரத்தை யுயர்த்தி

வரத்தை விழையப் பொழிவான் மராஅ

மரத்தை யிலங்கை யரசனின் பத்துச்

சிரத்தை யரிந்தான் சிறந்து

#வெண்பா 

 

வில்லேந்து கலி விருத்தம்

வில்லேந்து வீரனல்லேன் வெற்றியைச் சமர்ப்பிக்கக்
கல்லேந்து கோவில்செய்யக் கைத்திறனோ சற்றுமில்லை
சொல்லேந்து பாவமைக்கத் தூமதியைத் தந்தனைநீ
பல்லாண்டு போற்றிசைத்தல் பாவிக்கு முய்வன்றே
#கலிவிருத்தம்

செவ்வாயிற் செவ்வேள் வெண்பா

ஆண்டு பலகடந் தாயு ளதையிழந்து வேண்டிய வாழ்வு விளைந்ததோ - மீண்டும் பிறவிப் பெருங்கடல் வேண்டாமே சேந்தா சிறைவிடுத்துச் சீர்தாளைத் தா