ஆய்ச்சிமகள்

 ஆய்ச்சிமகள் கண்மணி யாநிரைக் காவலன்

பேய்ச்சிமுலை யுண்மணி பேய்மழைக் காத்தவன்

வாய்ச்சிரிப்பி னேழுலகு மண்ணுடு காண்பித்த

சேய்ச்சிறப்பைச் செப்பவே நா

தொலைத்தேனனை விருத்தம் (செவ்வாயிற் செவ்வேள்)

தொலைத்தேனெனை மலைத்தேவனி னலர்த்தாமரை யழகில் 

மலைத்தேனவன் சலிப்பேதுமி லமர்ப்போர்க்கள நகைப்பில் 

அலைத்தேவுழ றிரைப்போலுறை யடங்காவென  தகத்தில் 

நிலைப்பேனென நிதங்காத்திடு குகத்தேவனென் வியப்பே 

ஆறாறைத் தாண்டி கட்டளைக் கலித்துறை

ஆறாறைத் தாண்டி யணிதிக ழாண்டி யசைவறியா

நீறானிற் றோன்று நெருப்புரு ஞான்று நிகர்பகர

வேறேது மில்லா விழிவிழை யாற்றை வினயமுடன்

கூறாத நெஞ்சே குறைபிறப் போநீ குவலயத்தே

வார்த்தையில்லை விருத்தம்

வார்த்தையில்லை பொருளுமில்லை வாஞ்சையில்லை கவியினில்

நேர்த்தியில்லை நளினமில்லை யாப்பறிந்த பயனுமென்

சீர்த்தியில்லை த்ருப்தியில்லை வாசகர்க்குச் சற்றுமே

கார்த்திகேய முத்தமிழ் கடையனுக்கு மருள்வையே 

மாலைநீக்கு விருத்தம்

 மாலைநீக்கு மாலைநீக்க மேன்மைவீடு கிட்டுமோ 

சூலைநீக்கு சூலைநீக்க வாத்மஞான மெட்டுமோ

வேலைநீக்கு வேலைநீக்க விண்ணுமண்ணு மண்டுமோ

ஓலைநீக்கு வாலைநோக்கு போதறிந்திங் குய்மினே 

குறிஞ்சி வாழும் ஆண்டவர் விருத்தம்

 குறிஞ்சிவாழு மாண்டவர்கண் கொஞ்சிபேச வாசையா

செறிந்தஞான மாழ்தவங்க டுறந்தவாழ்க்கை தூநெறி

மறந்திராத மாட்சிபண்ணி சைத்தபாட்டு வேண்டிலை

அறிந்தயாவு மகற்றிவைத்து மன்பையென்றுந் தருகவே

ஆறு சக்கரங்களின் விருத்தம்

 ஆறு சக்கரங்களி னாற்றலான வாண்டவா

ஆறு சொற்பதங்களி னாதியான மூலவா

ஆறு சிற்குணங்களி னாயினேனு முய்யவே

ஆறு சொற்பதங்களை யாற்றவாவெம் மையனே

மாலைச் சிந்து

மாலை ஒவ்வாது செய்யு ஞானம் - செச்சை

மாலை சவ்வாது சாற்ற நல்கும் 

சூலை நீறாலே நீக்கு நாவன்  - போற்று 

சூலை நீறாக்கு நோக்கு பாலன் 

வேலை செவ்வேலை செய்யும் வேலன் - தேவ 

வாலை செவ்வாலை செய்யும் பாலன்

காலை செவ்வானஞ்  செய்யுந் தேவ  - வண்ணன் 

காலை மெய்ஞ்ஞானந் தேடி நாடே   

சத்திநாதன் விருத்தம்

சத்திநாதன் றாதையென்ன சார்ந்தவர்க்கு வரம்பிலாப்

புத்திநாத னண்ணனென்ன புத்திதோன்று ஞானமா 

முத்திநாதன் மாமனென்ன மூப்பிலாத முருகுடை 

யத்திநாத னளியளிக்க வானெமென்ன வையமே 

மாதேவு சிலேடை வெண்பா

மாதேவு வேடா மலர்மதி யாறாளா 

வாதேவு வேலை மலைவில்லா -தீதேகா 

சத்திநாதா வையாறா சங்கத் தமிழ்வேந்தே

முத்திநாதா மூன்றுதமிழ் தா 

சிறப்பென்றும் சிந்து (செவ்வாயிற் செவ்வேள்)

சிறப்பென்றுஞ் சேந்தனைச் சிந்தித்தல் - ஞான்றும்

மறப்பின்றி மாண்பொடு வந்தித்தல் 

உறுப்பொன்றிக் கந்தனைச் சேவித்தல் - மற்ற

உணர்வின்றிப் புந்தியிற் பாவித்தல்

பொறுப்பென்று மூலனைத் த்யானித்தல் - நாகப்

பொருப்பொன்றி நாதனைப் போற்றிடுதல்

இறப்பின்றி வேலனைச் சேர்ந்திடவே - மாயப் 

பிறப்பறுக்கும் பெம்மான்றாள் மறவாதே 

தூதுசென்று விருத்தம்

 தூதுசென்று தோற்றுநின்ற தூயநாத னெளிமையா

கீதைசொல்லி ஞானமீந்த கேடிலாத வளமையா

மோதலன்று வாதுவென்ற பார்த்தபாக னளினமா

காதலென்றி ராதைவென்ற கண்ணநின்ற னீர்மையே

சூலமேந்து விருத்தம்

 சூலமேந்து சத்திநாதன் கரமணைந்த பாலகன்

வேலையுண்ட வேலையேந்து வேட்டுவச்சி காதலன்

ஞாலமுண்ட மாமனொத்த வழகுடைத்த வாண்மகன்

ஆலமுண்ட வீசன்காதிற் பொருளுரைத்த சாமியே

உமை முருகா வெண்பா

 உமைமுருகா மான்மருகா வொய்யாரி வள்ளி

யமைவிலகாக் காதலா வுன்றன் - சுமைகருதா

முப்பொழுது முன்னாம மூச்சாய் முணுமுணுக்க

வெப்பொழுது வாய்க்கு மெமக்கு

நாராயண நாம மகிமை (வெண்பா)

நாரா யணனாம நேருண்டோ வாழ்வார்கள்

பாரா யணஞ்செய்யப் பத்திதருந் - தீரா

வினைதீர்த்துத் தீமையினை வேரறுக்கு மீற்றின் 

முனைவின்றி முத்திதரு மெட்டு 

நிறைமதி வெண்பா

நிறைமதி சீர்வளம் நேரற மாளுங்

குறைவிலி வாழ்வகங் கோரா - துறைதிரு 

மார்பா மணிவண்ணா வாழ்வாய்நீ யென்பார்க்குத் 

தீபா வளிவளர்க்குந் தேசு 

ஞாலமேழும் விருத்தம்

 ஞாலமேழு முண்டுமிழ்ந்த ஞானமூர்த்தி மாதவா

தூலமான வடிவெடுக்குந் தொண்டரன்ப சௌலபா

கோலமான ஆதிமூர்த்தி கூருகிர்த்த சிம்மவுன்

மேலவாவின் ஆழுமன்பர் காலம்வென்ற முத்தரே

உண்டி சோறு விருத்தம்

 உண்டிசோறு நீரிலாடை கொண்டவேலை யோய்நிலை

பெண்டிர்வீடு சுற்றமுற்று பிண்டமண்டு பிணிவளந் 

தண்டமுண்ட சன்னியாச மென்றுமாய மாயவ

வண்டமுண்ட கண்டவிண்டு தண்டுழாய வாழியே 

ஒன்றுமற்ற விருத்தம்

 ஒன்றுமற்ற நிலைகிடப்ப வொன்றதான வோர்பொருள் 

ஒன்றினின்றி யாவுமாக வுருவமைத்த வோர்பொருள்

ஒன்றினின்று விலகிச்செல்ல வூக்கிவிக்கு மாயையா 

கன்றுமேய்ப்ப கண்ணமன்ன காலநேமி காலனே 

பண் அளந்த விருத்தம்

 பண்ணளந்த பாவளிக்கும் பாவநாசி பங்கயம்

கண்ணளந்து பிம்பநோக்கி மீனடித்த வில்லனின்

மண்ணழுந்து தேர்நடத்தி மகுடங்காத்த மாயனின்

மண்ணளந்த விண்ணளந்த மன்னளந்த பாதமே

மீனாட்சி மன்னன் கலி விருத்தம்

மீனாட்சி மன்னன் விதைத்த தமிழ்மன்றம்

மீனாட்சி மன்னன் வளர்த்த தமிழ்மன்றம்

மீனாட்சி மைந்தன் மிளிர்ந்த தமிழென்றும்

வானாட்சி வையத் தமைத்திடுந் தானே

(வெண்டளைகளா லமைந்த கலி விருத்தம்)

அள்ளியள்ளி விருத்தம் (செவ்வாயிற் செவ்வேள்)

 அள்ளியள்ளி யளியளிக்கும் வள்ளிதேவி நாதனைத்

தள்ளிநின்று கண்டுவக்க வுள்ளதாகந் தீருமோ

வுள்ளியுள்ளி யுள்ளமெங்கும் பரவிநின்ற கந்தனை

யள்ளியள்ளி யாசைதீர வனுபவிக்க வேண்டுமே

விழியின் வழியே வழி

கலையென்ற கோவிலிற் கண்டெடுத்த சிற்பம்

விலையென்ன சொல்ல வியப்பி - லிலைமேன்

மழைநின்ற சிற்றுளையை வாகா யடக்கும்

விழியின் வழியே வழி

முருகனைப் போற்றும் வெண்பா

 முருகனைப் போற்று முருகிள நெஞ்ச

முருகிடுமே யோங்குவள ரன்பாற் - பருகநிதந்

தித்திக்குந் தேனாஞ் சிவமைந்தன் பத்தியதை

யெத்திக்கு மேத்திப் பழகு

சேறகற்று கலி விருத்தம்

 சேறகற்று முனைவகற்றுச் சேறொடுங்க நீர்நிலை

தேறகத்து முனைவதில்லை தீம்புனற்க ணூடுபோய்

தூறகற்றி வயல்கள்சென்று தூயவாழ்வ தீயுமா

றூறகற்று மவுனங்காக்க வோங்குமேன்மை கிட்டுமே

மூலமாகி விருத்தம்

 மூலமாகி ஞாலமாகி முழுதுமாக வெண்ணிநீ

காலமாகிப் பூதமாகிக் கடன்முளைத்த வுயிர்வளர்

பாலமாகி மறைந்துநின்று பார்ப்பதெம்மை யென்கொலோ

மாலனாகி யுள்ளங்கொள்ளு மலர்கிழத்தி கேள்வனே

நூறுமுகம் சிந்து

நூறுமுகங் காண்பதனில் நூதனங்கள் ஏது - அவுணர்

நூறமுகம் போர்சிரித்த நாதன் நல ஏது

மாறுமுக மாந்தர்விரி சூழ்ச்சியினியேது - குமரன்

ஆறுமுகன் மாண்பதனில் ஆழ்ந்திவிட போது 

சீறுமுக தேவர்தரு சஞ்சலங்கள் ஏது - வினையின்

ஊறுமுகம் வேல்சிதைக்கும் பாலன்புகழ் ஓது 

ஈறுமுகம் ஆவதென்ன ஐயமினியேது - மயிலின் 

ஏறுமுகன் யாண்டுமுளன் தந்திடவே பேறு 

கண்ணுண்டே காக்க நமை வெண்பா

 புரந்தரனு நான்முகனு மீசனும் போற்று

நிரந்தர னீர்க்கமலக் கண்ணன் - பரந்தாமன்

மண்ணுண்ட வாயன் மலர்மன்னு மாதிறைவன்

கண்ணுண்டே காக்க நமை

திருக்கூடும் கலிப்பா

 திருக்கூடு மார்பழகா செருக்காளுஞ் சார்ங்ககரா

விருப்பாளும் வடிழகா வெறுப்போர்க்குங் காருணியா

திருப்போரூர் மருகனுக்கும் பொருப்பாளும் பாங்குரைத்த

திருக்கூடற் றிருவழகா மறைக்காதுன் னிசங்காட்டே

காலத்தின் கோலமிது காண் வெண்பா

 அறந்திகழும் நாடெங்கே ஆன்றநெறி எங்கே

துறந்த பயனாந் துயரே - மறந்தோமே

ஞாலத்தின் மூலவனை நான்மறையின் நாயகனைக்

காலத்தின் கோலமிது காண்

முத்துக்குமரா கட்டளைக் கலித்துறை (செவ்வாயிற் செவ்வேள்)

 முத்துக் குமரா முகிழ்நகை யத்திக் கிறைவாசிவ

சத்திக் குமரா சரவ ணபவா தமிழ்மரபின்

சித்துக் குமரா திருமான் மருகா வரைதிகழுஞ்

சொத்துக் குமரா சுவையார் தமிழ்தா துதிசெயவே

சீயமிட்ட பிச்சை விருத்தம்

 சீயமிட்ட பிச்சையிந்தச் சீருடைத்த சிந்தனை

காயமுற்ற விச்சைவேக மாயவாயன் வந்தனை

நேயமுற்று நெஞ்சமர்ந்த நேமியானி னெட்டினைத்

தோயமிட்டு மண்ணணிந்த தூயதேக மெட்டவே

மஞ்சனங்கள் விருத்தம்

 மஞ்சனங்க ணீரிலாடி மாலைசூடு தண்டுழாய்

பஞ்சணைக்கண் டுயிலுமில்லை பாறைநின்ற விட்டலா

வஞ்சகர்க ணறியொணாத தூபதீப சேவையை

யஞ்சனத்து வண்ணநீ யடியர்க்கீந்த வாதிதே

சீரென்றும் வெண்பா

சீரென்றுஞ் சிங்கத்தைச் சேர்வது கம்பனெனுங்

கூருகிர்த்த குட்டனைச் சேர்வது - காரொன்றுந்

தாரகலச் சிங்கத்தைச் சேர்வது மாமலராள்

மாரமர்ந்த சிங்கத்தைப் பாங்கு

மூலமாகி விருத்தம்

 மூலமாகி ஞாலமாகி முழுதுமாக வெண்ணிநீ

காலமாகிப் பூதமாகிக் கடன்முளைத்த வுயிர்வளர்

பாலமாகி மறைந்துநின்று பார்ப்பதெம்மை யென்கொலோ

மாலனாகி யுள்ளங்கொள்ளு மலர்கிழத்தி கேள்வனே

செந்நா வெண்பா

செந்நாச் சிறப்புடைத்த சீரார் புலவர்சொ

லெந்நாளும் பொய்க்கா தெனவுணர்ந் – தந்நாளிற்

சங்கம் வளர்த்துத் தமிழாண்ட மன்னர்தந்

தங்குபுகழ் தாழ்த்தா துலகு

அக்கரங்கள் விருத்தம்

அக்கரங்கள் கொண்டுசெய்த வழிவிலாத மாலையை 

யிக்கரங்க டொண்டுசெய்ய யினியயாப்பு விருத்தமா

சக்கரங்கொள் சங்கதங்கு செக்கரங்க ளாதிதே

யுக்கிரங்கொ ளோகசிங்க மூழிசூடி யற்றிடே 

தீயவன் கட்டளைக் கலித்துறை

தீயவன் பாங்கு சிவனார் பொறிநதி சேர்த்துதித்தச் 

சேயவன் பாங்கு திருவாரற் பெண்க டிருமுலைப்பால்

காயவன் பாங்கு கதியருட் பாலகன் கார்முகிலா

நேயவன் பாங்கு நினைவி னிலைத்த னிறையருளே 

வெண்டாமரையாளை கட்டளைக் கலித்துறை

வெண்டா மரையாளை வேதற் கினியாளை வீணைகரங்

கொண்டா ணிறையாளைக் கூத்தனூர் மன்னு குருவடிவை

யெண்டா மறையாளை யேரே றனத்தாளை யேத்துதினந்

தொண்டா முறைசெய்யச் சொர்க்கத் துயர்வாகுந் தொல்லுலகே

மூல வெளிப்பாடாய் (நவராத்திரி கலி விருத்தம்)

 மூல வெளிப்பாடாய் முப்பெருந் தேவியர்

ஞால நலம்பெற மும்மூன்று நாள்கள்

சீலம் பெருகச் சிறப்பாய் விழவமர்ந்த

கோலம் விழிகாணக் குற்றங்கள் தூசாமே

(வெண்டளைகளாலமைந்த கலி விருத்தம்)

நவராத்திரி எண்ணலங்கார வெண்பா

 ஓராதி யீராகி மும்மூர்த்தி நான்மறையா

பாரந்த வைம்பூதம் பாங்காறு பாதையொ

டீரே ழுலகாளு மெண்ணெட்டாத் தொன்னவமே

பாரேத்து வெற்றிநாள் பத்து