கன்றெறிந்து கலி விருத்தம்

கன்றெறிந்து கன்றுமேய்த்துக் குன்றெடுத்த கண்ணனா
சென்றுமீட்க பூமியாளைத் தந்தமேந்து பன்றியா
வென்றுபோர்கள் வீற்றுநின்றி ராமராம நாரணா
வின்றுமென்றுங் காக்கவெம்மை யுன்றனாசி நின்றதே
#கலிவிருத்தம்

"வெட்டியாக" கலி விருத்தம்

வெட்டியாக வேலையின்றி வீற்றிருந்து நாளெலா
மிட்டமான காட்சிதேடி யிங்குமங்கு மலையவே
யெட்டிவானை நோக்கியாழ வேற்றமான பிம்பமாய்க்
குட்டியானை யென்றுநின்ற கொண்டலுள்ள மள்ளுமே

தேவாதி தேவரும் வெண்பா

  

தேவாதி தேவருந் தீரா வினையகலப்

பாவாலே போற்றிப் பணிந்துவக்கு - மேவரு

 

மாலுறுஞ் சேவை மகிழ்ந்தளிக்கு மாதவனின்

 

மாலிருஞ் சோலை மலை

 

#வெண்பா

 

தானைத் தலைவன் கலி விருத்தம்

தானைத் தலைவன் தளிர்புரையுந் தாள்பணிந்
தானைத் தலைவ னழகுமுக மாறாழ்ந்து
மோனைத் தொடையழகின் முந்தெதுகை சேர்ந்தமையத்
தேனைக் குழைத்துரைப்போந் தீந்தமிழாற் செவ்வேட்கே

கன்றெறிந்து கலி விருத்தம்

 

கன்றெறிந்து கனியுதிர்த்த கைகளிந்த கைகளே

குன்றெடுத்து மழைதடுத்த விரல்களிந்த விரல்களே

சென்றுடுத்த சேலைதந்த சிந்தையாளுந் தேவனே

யின்றுவந்து வெண்ணையுண்க வூழிதோறுந் தாங்கவே

#கலிவிருத்தம்

 

பிறப்புற்ற வெண்பா

பிறப்புற்ற செல்வந்தர் பெற்றமகன் சொல்கேட்
டறப்பற்று வேண்டி யரனைச் - சிறப்புற்ற
பாவா லலங்கரித்தார் பட்டினத்தா ரொற்றியூர்ச்
சாவா துறைந்தார் சிவத்து
#வெண்பா

எல்லாம் அறிபவளே வெண்பா

எல்லா மறிபவளே யெல்லா மருள்பவளே
பொல்லா தவர்க்குப் பயங்கரீ - யெல்லாத்
துயரு மரிபவளே தாயே திருவே
யுயர்வணக்க மென்று முனக்கு 

காரார்முகில் கலிவிருத்தம்

காரார்முகில் கோவேதுணை தார்மார்பினி லுறைவா
ணீராலுனை நாளுஞ்சொரி கார்யானைக  ணடுவே
சீரார்மரை வீறாளுமை  நாராயணி யுனதா
டீராவினை சேராதெமை மாறாநிலை தருமே 

#கலிவிருத்தம் 

உறுதியைக் கைவிடாது வெண்பா

உறுதியைக் கைவிடா துன்செயலை மேற்கொண்
டிறுதியை யீவா யிறைக்க - ணறுதித்
தரத்தாற் றமைக்குந் தடங்கலாய்த் தோன்றுஞ்
சிரத்தாற் றவன்கண் சினம்

நாவொடுக்கி கலி விருத்தம்

நாவொடுக்கி நோன்பிருந்து ஞானமுற்று நாளெலாம்
பாவடுக்கி நன்றிசைக்க பாவையுள்ளம் போலவே
மூவடிக்கி ரந்துநின்ற மூப்பிலாத வாதிமேன்
மாவலிக்கு மாண்பளித்த மாவடிக்கண் டஞ்சமே

கடன்மேவிய கலி விருத்தம்

கடன்மேவிய நெடுவேதனை கடும்வாழ்வெனை விடுமோ
குடன்மேவிய நெடுவேதனை குறைந்தாற்சுகம் வருமே
கடன்மேவிய நெடுமால்வரை  கடைந்தான்கழல் கிடைத்தாற்
குடன்மேவிய நெடுவேதனை கொடும்வாழ்வறு நிசமே

 

பழமாலை வெண்பா

பழமாலை யேந்தும் பழையோனை வேண்ட
நுழையாதே யெந்நாளுந் துன்ப - மழைமேக
மன்ன வருளு மரிமருகன் வீற்றிருக்க
வென்ன கவலை யெமக்கு

 

கூன்பிறையை வெண்பா ( செவ்வாயிற் செவ்வேள்)

கூன்பிறையை யார்சூடுந் தான்றோன்றிப் பேரொளியான்
வான்றோன்றற் காக்க வரமளித்துத் - தான்றோன்றிச்
சண்முகனாய் நின்றது நற்பேறாம் போற்றியவன்
ஒண்முகத்திற் கோதொரு  பாட்டு 

கருணா நிதியே வெண்பா

கருணா நிதியே கனிமொழி பாடு
மருணான் மறையின் பழநீ - திருவா
ரெமிராமச் சந்திர னின்ப மருகா
சமரா செயலலி தா

 

மந்திரங்கொள் விருத்தம்

 

மந்திரங்கொள் வேள்வியு மஞ்சனங்கொண் மேனியு

மங்கைதங்கு மார்பினன் மண்மடந்தை சூழ்ந்திடத்

தந்திரங்கொண் டைவரை தேர்நடத்தும் பாகனாய்ச்

சொந்தபந்தம் வீழ்த்திநல் வெற்றிவாகை சூடவே

பந்தனான நண்பனாய்ப் பார்விளக்கும் பரமனாய்ப்

பாரதத்தி னாயகன் பார்ச்சிறந்த மாணியன்

எந்திரங்கொள் வாழ்விலே ஏற்ற(ம்)பெற்று நாமுய

இங்குவந்த டைந்தனன் வையாவூர்க் கள்ளனே

எண்சீர் விருத்தம் 

அரனார் அகமகிழ் விருத்தம்

அரனா ரகமகிழ் மைந்தா
    அணியா றகமுறை நாதா
சிரமா றுடையுமை பாலா
     சிகையார் மயிலமர் வேலா
மரையார் திருமகள் செல்வி
     மனையாய் மணமகிழ் கோவே
திரையார் துயிலரி மருகா
     துணையா ருயிருய வேறே

 

அறு சீர் விருத்தம் 

மாயப் பிறப்பறுக்கும் வெண்பா

மாயப் பிறப்பறுக்கு மாயவனை நீங்காத
தோயவன் மார்புறையுந் தூயவ - ணாயகன்
பேரதனில் பாதியிவள் பெற்றுளதால் பூசனைக
ணேரிவட்குச் செல்லு நிதம்

 

கடல் துயின்ற கலி விருத்தம்

கடற்றுயின்ற மாதவா கடற்கடைந்த தெங்ஙனே
குடற்களைந்த சிங்கமாய் குதித்துவந்த தெங்ஙனே
கடற்கடந்தி லங்கைவீ ழலர்க்கணைக ளெங்ஙனே
படைத்தகால நேமியாய் புலர்ந்தகால முன்னுளே

கலி விருத்தம் 

குடத்திருந்த கலி விருத்தம்

குடத்திருந்த வெண்ணையைக் குடித்துவந்த வாயனே
குடத்திருந்தை யென்பதாற் கொடுத்துவீடு தாயுளங்
குடத்திருந்த சிற்றுயிர்க் கொடுங்கணைக்கண் காத்தனைக்
குடத்திருந்து ழற்பிறப் பறுக்கவல்லை யல்லையே

செவ்வாயிற் செவ்வேள் கலி விருத்தம்

அவனிக் கறுமுக னாறுதித்தா னன்று
சிவனுக் கருமகன் சீருரைத்தா னன்றா
யுவமைக் கொருபொரு ளாருரைப்பார் குன்றா
ளிவனுக் கிணையிவ னேறுடைத்தான் கன்றே

அஞ்சுகம் வெண்பா (மீனாக்ஷி)

அஞ்சுகங் கையேந்தி யஞ்சகங் காத்தருளு
நஞ்சகற்றி நாதர்க் கமுதாக்குங் - கொஞ்சுதமிழ்ப்
பாவிரும்பும் வேடமகள் பங்கற்கு வேறந்த
தேவிபுகழ் செப்பற்கே நாவு
#வெண்பா

மாடெடுத்து மரமெறிந்து கலி விருத்தம்

மாடெடுத்து மரமெறிந்து கனியுதிர்த்த தன்றியுங்  
கோடெடுத்து மாரிகாத்த  குடைபிடித்து மாக்கள்வா  
ணாடிழந்த வன்பரன்பு தூதனான மாயவன்
றேடிவந்து பத்தரின்ன றீர்த்துவுப்ப னையமே
#கலிவிருத்தம்

 

எட்டெழுத்து கலி விருத்தம்

எட்டெழுத்து நித்தமோதி யிட்டமான பூசைசெய்

விட்டுபத்தர் வேதமோதி செய்துவந்த மஞ்சனம்

 

பட்டுடுத்து போதுமாது தொட்டணைத்த கோலமா

 

கட்டவாக்க விச்வரூப சிங்கவேளின் காட்சியே

 

#கலிவிருத்தம்

 

யோகமூர்த்தி கலி விருத்தம்

 

யோகமூர்த்தி கையிலேந்து மம்புவில்லுஞ் சக்கரம்

போகமூர்த்தி திருவணைத்த புன்சிரிப்பு மூன்றுகண்

நாகமூர்த்தி குடைபிடிக்கு நகைவிளங்கீ ராறுபல்

வேகமூர்த்தி பாலன்காத்த விசுவரூப சிம்மமே

#கலிவிருத்தம்

 

துடியிடை மடமயில் விருத்தம்

 துடியிடை மடமயி லொருபாதி
     துகிலென வரிகரி கொளுமாதி
          சுருதியி னுரைபொரு டனைமேவி
               சுகமளி மதுமொழி யுறையாவி

யடலிடை வருவிட மிடறாகி
     யமுதென வுலகளி யொருயோகி
         யணிநுத லருவிழி யுடையோனே
             யரவணி மதிநதி சடையோனே

சுடரொளி விரிகதிர் சகடாக
     சுரரணி யனைவருந் துணையாக
          திரிபுர மெரிசெய விதுவேனோ
             சிறுநகை யதுதகு மிறைவோனே

துடியிடை யிருமொழி தருவோனே
     துதியுனை நனிசெய வடியேனை
          மதியமர்ந் தனிவழி தருவாயே
              கதிதரும் பசுபதி பெருமாளே  

பன்னிரு சீர் விருத்தம் 

நிலைக்கும் ஏழு ஞாலமும் கலி விருத்தம்

 

நிலைக்குமேழு ஞாலமு நினைப்பிலென்று நீங்கிலா

 லிலைக்கணீந்து பாலனி னிருப்பையென்று நீங்கிடா

வலைக்கணுற்ற தேவியுன் வளைக்கரங்கள் கண்டுநா

 

மலைப்பிலாழ நாளெலா மலர்க்கணின்றை போலுமே

 

#கலிவிருத்தம்

 

ஆடிப் பூர வறுசீர் விருத்தம்

 ஆடிப் பூரத் தவதரித்து
     வாயர் பாடித் தனைநினைத்துக்
கூடத் தேவைப் பரிதவித்துக்
     கோலக் கோவைத் தமிழளித்து
நாடிப்  பாவை  நெறியறுத்து
      நாதர் தாள்சேர் வழிவகுத்து ச்
சூடித் தந்த சுடர்கொடியைப்
       பாடப் பார்க்கண் பிறந்துவந்தேமே

 

ஆடிப் பூர விருத்தம்

 

பூரத்திற் பூரித்துச் செகத்துதித்தாள்

பூவைக்கும் பூசைக்குப் புனைந்தளித்தாள்

சாரத்தில் வேதத்தைச் சிறந்தளித்தாள்

சாவில்லா வானாளப் பாவமைத்தாள்

காரொத்த வண்ணற்குத் தனையளித்தாள்

காணிக்கை யண்ணற்குக் கடனளித்தாள்

பாருக்கு வழிகாட்டப் பாவைசெய்தாள்

பாவிக்கு மொழிகாட்டுஞ் செகத்துதித்தாள்

#அறுசீர் விருத்தம்

 

பூவைவண்ணன் கலி விருத்தம்

பூவைவண்ணன் பூத்தொடுத்த பட்டர்பிரான் தோன்றலே
பாவைவண்ணப் பாத்தொடுத்த பாவையெங்கள் பாவையே
நாவைவண்ணஞ் சீரமைக்கு நாளுமுன்றன் பாடலே
கோவைவண்ணஞ் சீரமைத்த கோதையென்றும் வாழியே   

கலி விருத்தம் 

முக்கனியைச் சாறாக்கி வெண்பா

முக்கனியைச் சாறாக்கி முத்தமிழாய்ச் சீரமைத்த
முக்கணவன் மைந்தா முருகுருவே - தக்கவொரு
பாட்டிசைத்துத் தாள்பணியப் பார்த்தருள்வா யாழ்ப்பாணர்
மீட்டிசைக் கேற்ற விலக்கு

செவ்வாயிற் செவ்வேள் கலி விருத்தம்

இறையென் றுணர்வா ரிசைவைப் பெறுவார்
நிறையென் றுணர்வார் நினைவைப் பிரியார்
குறையென் றுறைவார்  குகனைத் துதியார்
முறையென் றுரைவா  முருகா வுனையே   

தலைபத்துதிர கலி விருத்தம்

தலைபத் துதிரக் கணைவிட் டவரா
மலையிற் றுயிலுந் திருமான் மருகா
நிலையற் றுழலும் விதிபற் றடியேன்
கலியைக் களையுங் கவிபற் றருளே 

திருவிலங்கை கலி விருத்தம்

திருவிலங்கை நோக்கழிக்கத்  திறனுடைத்த ளாயினுந்
திருவிலங்க னாதர்வந்து செருவிலங்கை வென்றிடத்
திருவிலங்கை யேற்றுவந்த பொறையுடைத்த தேவிநீ
திருவிலங்கை கருவிலங்கை யிருமைநீக்கி வீடளீ

திருவிலங்கை வெண்பா

திருவிலங்கை தீயத் திருவிலங்கை யேவித்
திருவிலங்கை நீக்கத் திருந்தா திருவிலங்கை
யின்றுபோய் நாளைவா வென்றுரைத்து வென்ற
திருவிலங்கை நாமமே தீர்வு
#வெண்பா

மண் கடந்து கலி விருத்தம்

மண்கடந்து விண்கடந்து கண்கடந்த மாணியா
யொண்கடந்தி ருள்கடந்து வெளிகலந்த வுள்ளுமாய்
திண்கடந்து நுண்கடந்து சித்தினோட சித்தூமா
யெண்கடந்த வீசவுன்னை யாவர்காண வல்லரே