திரோதான வெண்பா

 

திரோதான மாளுந் திருமக டாமே

திரதனந் தந்தருளுந் தெய்வம் - விரோதிக

ளைவ ரொருமுகத் தாண்டு பரகதிசேர்ந்

துய்வதற் கூன்றா முயிர்க்கு

#வெண்பா

 

வடிவுடை அறு சீர் விருத்தம்

 

வடிவுடை யரசியுன் சகடமதை 

யதிரடி கடவிய தினமதனி

லிடருறு மிருபுவி விடியவென 

விலகென நரகனை விழவைத்த

வெடிவிட விதியுள விடியலதி 

லிடியென வதிரிடும் வெடியிலையே

கொடு(ங்)கலி தலையெழ விதுநிகழ 

மலையனு மிரவொரு குறையிலையே

#அறுசீர்விருத்தம்

 

விடியா கட்டளைக் கலித்துறை

 

விடியா விதியின் விதிமாற்றும் வேங்கடம் வெம்மைதரு

மிடியி னனலின் விதிமாற்றும் வேங்கடம் வேலையிடைப்

படியிற் பரமன் பதிகொண்ட வேங்கடம் பார்த்தருள

நொடியி லளியை நுடங்கு முயிர்க ணிலைபெறவே

#கட்டளைக்கலித்துறை

 

ஆற்றை பஃறொடைவெண்பா (செவ்வாயிற் செவ்வேள்)

 

ஆற்றைச் சடைக்கரந்த வைம்முக னாறாக

வாற்றின்க ணெற்றி யனற்பொறியை யாற்றினா

னேற்றமிகு வாறுரு வின்முறுவற் பாலகராய்த்

தோற்றமுற நாற்றவறு தூமலர்க்க ணூற்றமிகு

வாறனையர் பாலூட்டு மன்பால் வளர்ந்தாரி

னாறுதலை யொன்றணைத்தா ளன்னையுமை மாறுதலா

யோருடல மாறுதலை யுற்ற திருமுருகன்

காருருவத் தானவரை வேரறுக்கப் பாருதித்துப்

போர்புரியச் சத்திதரும் பொன்வேலைப் பெற்றுவந்

தார்ப்பரிக்கு மார்கடலில் வற்றிடவே நேரெறிந்து

சீர்பெருக ஞாலமெங்குஞ் செய்த சிறுவனைச்

சீர்பெருகச் செவ்வாயிற் செப்பு

#பஃறொடைவெண்பா

 

முத்தெடுக்க கலி விருத்தம்

 

முத்தெடுக்க வேலையாழ்ந்து மூச்சடக்கி மூழ்கியே

முத்தடுக்கு நகையுடைத்த மங்கைபங்கர் மூர்த்திமேன்

முத்துடைத்த முத்தமிழ்க்கண் மோகமுற்று நித்தமும்

வித்தைகற்ற புலவனென்ன போற்றிசைக்க வேட்கையே

#கலிவிருத்தம்

 

காத்திருந்து கலி விருத்தம்

 

காத்திருந்து நோற்றிருந்து காட்சிவேண்டி நாதனை

நாத்திருந்து பாத்தொடுக்க ஞானமேது மில்லையே

பூத்திருந்து புந்தியுள்ளே சித்தசுத்தி நோக்கிலை

சாத்துணிந்து நாதபாதம் யாவுமென்று தந்திடே

#கலிவிருத்தம்

 

இடையா இளித்த வாயா

 

என்றடைவே னுன்னை யெனவறியே னென்றாலுந்

தின்றிளைத்தேன் வெண்ணெய் தினந்தொழுதே - குன்று

குடையா வெடுத்தன்று கோகுலத்தைக் காத்த

விடையா விளித்தவா யா

#வெண்பா

 

நாடற்ற கலி வெண்பா

 

நாடற்ற நல்லரச னங்கை வலப்பாகன்

காடுற்ற நீறணியுங் கங்கைச் சடைதாரி

யேடுற்ற தூமலரா னேத்த வருடந்த

வீடற்ற காழியா னென்பணி மாலையான்

கோடுற்ற வேழவுரி கைத்தாங்கு மான்மழு

வோடுற்ற வாமையல ரொண்ணிலவு பாம்புநதி

யாடற்குக் கோனணியு மாபரணத் தேற்றமொடு

பீடுற்ற மெய்யன்பர் பேறருள் பெற்றுவந்து

பாடுற்ற தேனமுதைப் பாங்கற்ற வேழையனு

மேடுற்ற கல்வியிலா தேத்தவில்லை யென்றாலுங்

கேடற்ற பெம்மானை நாடற் கருளிருந்தாற்

கூடுற்ற வாழ்வதனிற் கோதற்ற வேற்றமுடன்

மாடுற்று வாழ்ந்திம்மை மாண்பாய் மறுமைசேர்வாம்

வீடுற்ற பேறே விளைந்து

 

#கலிவெண்பா

 

பையரவம் சாழல்

பையரவக் குடையின்கீழ் பாலாழித் துயில்கின்றா
னுய்யவர மருள்வானென் றுரைக்கின்றா யென்னேடீ
செய்யவரம் பரமபதம் பையரவ நமக்கருளுஞ்
செய்யவளும் பாலாழிச் சிறுமியன்றோ சாழலோ   

தரவுகொச்சகக் கலிப்பா #சாழல்    

பத்திழிந்து கலி விருத்தம்

பத்திழிந்து பாரடைந்து பத்திஞான மாகம
முத்தளித்து நன்மைகாத்து முற்றழிக்க வல்லவை 
சித்தமர்ந்த சித்தமர்ந்த சுத்தமான சத்துவா
வித்தொழிந்து முத்திகாண வித்தையான சத்தியே  

யாப்பும் வெண்பா

யாப்பும் பொருளு மிசைந்து கவிபாடக்
காப்பு மறிவுங் கருணையினா - னாப்புலமை
தன்னோடுந் தந்தருளுஞ் சண்முகனைச் செந்தமிழா
லெந்நாளு மேத்துவே னான்

 

ஓர் மலை வெண்பா

ஓர்மலை மத்தாக்கி யொள்ளரவ நாணாக்கி
யார்க்கடலை யன்று கடைந்தகணங் - கூர்மமாய்
நின்றானைக் கூர்ந்திடுவாய் நெஞ்சே யருமாயை
யொன்றானை யோங்குகரஞ் சேர்த்து

 

மண்ணுளோர் கலி விருத்தம்

மண்ணுளோர் பிறப்பறுக்கு மண்ணளந்த நின்கழல்
விண்ணுளோர் பிணக்கறுக்கும் விண்ணளந்த நின்கழன்
மண்ணுளே மறைந்தலோக மன்னுமன்ன னாக்குமே
பண்ணுளே யடங்கவல்ல பண்புடைத்த பாதமே   
#கலிவிருத்தம் 

 

வானளந்து கலி விருத்தம்

 

வானளந்து மண்ணளந்து கோனடங்க நின்றவை

வானுறைந்த நீரடங்க மானுடர்க்குத் தந்தவை

நானொடுங்க மாபெருத்து மூன்றடுக்குச் சென்றவை

மானடத்து மாணியாளு மொப்பிலாத பாதமே

#கலிவிருத்தம்

 

ஐந்து மொன்றி கலி விருத்தம்

ஐந்துமொன்றி யாடவத்த ரைந்தெழுத்தை யுள்ளியே
யைந்துமொன்று மாங்கிருத்தி மங்கைபங்கர் தம்முகத்
தைந்துமொன்று மாழ்ந்தகாட்சி யைத்தியான மின்றிநா
மைந்தமொன்று மானநாத னின்றனெங்கு மாழவே

#கலிவிருத்தம்

உலகத்து செவ்வாயிற் செவ்வேள் வெண்பா

உலகத் துயிர்க ளுவுப்புடன் வாழ
கலகத் தழிக்குங் கருணை - திலகத்
தணிநீ றழகை  யயிலை மயிலைப்
பணிநீ கவிபுனையப் பாங்கு  

 

அன்னையாகி கலி விருத்தம்

அன்னையாகித் தங்கையாகித் தாரமாகி மகளுமாய்
மன்னிவாழுங் காலமாளு மாதிரூப மோகினி
கன்னியான மாயவாயி கொள்ளுவேட மெத்தனை
சென்னிதாழ வுன்னையாழச் சிந்தையாளு தேவியே

 

மீனளை பாவை

மீனளை மன்னு மதுரை யரசியைக்
கானக் கடம்பமுறை கந்தக் குழலியைக்
கூனிலாச் சூடுதலைக்  கூத்தரின் பங்கியை
வானவர் காணா வடிவுடைச் செல்வியை
மோன முனிவர்க ளுள்ளுனர் சோதியை
யூனுருகிப் பாடி யுளமகிழ்ந்து சேவிக்க
ஞான நிலையுங் நவில்கவி செந்நாவுந்
தேனெனச் சித்திக்குஞ் செப்பேலோ ரெம்பாவாய்

 

நீரால் விருத்தம்

 

நீராற் றம்பித்த வாழ்க்கை நேராய்த் தாபிப்ப தெளிதோ

நீராற் றம்பித்த வாழ்க்கை நேராய்த் தாபிப்ப தெளிதோ

நீராற் றம்பித்த வாழ்க்கை நேராய்த் தாபிப்ப தெளிதோ

நீராற் றம்பித்த வாழ்க்கை நேராய்த் தாபிப்ப தெளிதே

#அறுசீர்விருத்தம் #ஏகபாதம்

 

மலையரையன் வெண்பா செவ்வாயிற் செவ்வேள்

 

மலையரையன் மாள்பெற்ற மாணிக்க மேழு

மலையரையற் கன்பு மருகன் - மலையரையன்

மாக்கயிலை நாத னகமகிழு மாசாற்கு

வாக்கியலால் வாழ்த்தவே நாவு

#வெண்பா

 

திருவும் வெண்பா

 

திருவு முடலின் றிடமு நிலையா

துருவப் பொலிவு மொருநாள் வரையே

கருவங் கொளுதல் கொடுக்கும் பயனென்

மருவாப் பொருளை மருவு

#வெண்பா

 

கலைமான் வெண்பா

 

கலைமா னரிவை கலைதரச் செய்ய

வலைமா னரிவை யருத்த - மலைமா

னரிவை மறந்தரு வோளே பகர்வோம்

பரவை யரிவை புகழ்

#வெண்பா

 

கவிச்சிங்கம் வெண்பா

கவிச்சிங்கங் கைவைக்க கல்லுங் கனகம்
புவிச்சிங்கம் வந்த புகழோர் - செவிச்சின்ன
மெம்பெரு மானை யியைந்த வழகுடையார்
தம்பெருமை சாற்றவுண்டோ சொல்

#வெண்பா

 

வெண்டாமரையாள் கட்டளைக் கலித்துறை

 

வெண்டா மரையாள் விழைய வசமாகுங் வித்தையெலாங்

கண்டா மரையாள் கனிய கவிபாடுங் கல்லுருகிப்

பெண்டா மரையாள் பெயர்கள் பலவும் பிடித்துரைத்து

விண்டா மறையாள் கடைக்கண் விழிக்க விழைந்தினமே

#கட்டளைக்கலித்துறை

 

மாதவன் மாருதி சிலேடை வெண்பா

மாதவன் றூதவன் கோதிலா வாதவ
னாதனென் றோதுவா னீதிமான் - சாதலின்  
மேதினிக் காதலன் சீதைசொன் னாதன்சொல்
வேதமென் றோதுவா னேது  

காமாட்சி சோலை மலை சிலேடை வெண்பா

தூயவன் பாளுந் தலைமை மலைமாதா
மாயவன் றங்கை யயிலாட்சி - சேயுடை
யாமாட்சி செய்யு மழகிரு தேவிமலைக்
காமாட்சிக் கீடில்லை காண்

அம்பிறங்கி கலி விருத்தம்

அம்பிறங்கி யானைராச னங்ககவ்வு முதலையை
யம்புறங்கு வாதிதேவ ரங்குசென்ற வக்கணந்
தம்பிறங்கு நேமிகொண்டு தத்தவேவு கருணையை
யம்பரும்ப ரிம்பரென்று நின்றுபோற்றி மகிழ்வரே   
#கலிவிருத்தம்

அறிவால் வெண்பா செவ்வாயிற் செவ்வேள்

அறிவா லறிந்து னடியை யடைய
நெறிவா யரிதே யறிவோங்  -  குறையா
துணர்வா லுனையே வணங்க வருள்வாய்க்
கணவேந் திளையா கனிந்து  

கந்தனம்மை கலிவிருத்தம் (ஏகபாதம்)

கந்தனம்மைக் காக்கவெம்மை கட்டமேது மொட்டுமோ
கந்தனம்மை காக்கவெம்மை கட்டமேது மொட்டுமோ
கந்தனம்மைக் காக்கவெம்மை கட்டமேது மொட்டுமோ
கந்தனம்மை காக்கவெம்மை கட்டமேது மொட்டுமோ
#கலிவிருத்தம்

மந்திபாயும் கலி விருத்தம் (ஸ்கந்த மாதா)

மந்திபாயு சோலைசூழு மின்னுதங்க வெற்புறை
யிந்துசூடு நாதர்பாக மேற்றுவந்த தேவிநீ
கந்தனம்மை யென்றுநின்ற காட்சிகாண விற்றைநாண்
மைந்தரெம்மை வைத்தமைக்கு வாழ்வனைத்து நன்றியே

மேதினி வெண்பா

 மேதினி மாதணி கோதிலி காதணி
யாதினி நோக்கவு மெண்ணமெலாம் - வாதினிற்
சூரனை வென்றவன் தோற்றிய தொன்மொழிக்க
ணேரடிச் செல்லு நெகிழ்ந்து

குறள் வெண்பா

தாதை யெழுது தலையெழுத்தை மாற்றவல
காதை புனைவோம் கவி

எல்லா வணியு மணியல்ல வெல்லவொணாச்
சொல்லாந் தமிழே யணி

எல்லா வணியுமணி யல்லதமிழ்ச் சொல்லா
லணியு மணியே யணி

கன்னப்பூப் பூணுங் கவின்மாதர் கண்டக்கால்
கன்னற்பாக் கொட்டுங் கவிக்கு

 

காதணிக் காதல் வெண்பா

காதணிக் காதல் கவிக்காதல் வென்றிதருந்
தாதுரைக் காதல் தமிழ்க்காதல் - மாதுரைக்
காதல் மலர்காதல் கண்டேம் விதிக்காதல்
சாதல் தழுவா தெமை

மாதணி கலித்துறை

மாதணிக் காதின் மயக்காத லென்னே மதுரமொழித்
தாதினிக் காதோ தழைக்காதோ குன்றாச் சுவையமுதங்
காதணிக் காதல் கவிக்காத றந்தாள் கவினுருவின்
காதணிக் காதல் கவிக்காத னந்தாக் கலையழகே

யாக்கை வெண்பா

யாக்கை யழியு மழியா தகரமுத
னாக்கைப் பழக்கும் ழகரத்து - வேட்கை
விடுமோ தமிழரைக் காதணியின் மேன்மை
முடிவிலி யின்ப முடைத்து

குயிலெனப் பேசும் கட்டளைக் கலித்துறை

குயிலெனப் பேசுங் குரலாள் குவலயக் கோள்களையப்
புயலெனப் போரும் புரிவாண் மலரன்ன புன்சிரித்து
மயிடனைச் செற்ற மடவா ணிகரின் மடங்கலேறி
யுயிரெனப் போற்று முலகு மறவா துகவுகமே
#கட்டளைக்கலித்துறை

திருவோடு வெண்பா

திருவோ டிருந்தாற் றிரனாய் வளர்க
திருவோ டிருந்தா லிரந்து - திருவோ
டிணங்கிப் பொறுப்பினை யேற்று மகிழ்க
வணங்கத் தகுந்தது வாழ்வு

 

தளையைக் கடக்க வெண்பா

தளையைக் கடக்க வகவல் பயில
வெளிதா யிலையே யிதுயே - னளையே
விரும்பு மழகா வியம்பு திருவோ
விரும்போ தடையன்றோ வீங்கு

பணத்தின் வெண்பா

பணத்தின் மயங்கிப்  பழுதாக்கும் வாழ்வைக்  
குணத்தி னிலையைக் குலைக்குங் கணத்திற்
பிணத்தி னிலையே பெரிதுவக்கத் தோன்று
மணத்தின் மடிவதே மேல் 

உண்மை வெண்பா செவ்வாயிற் செவ்வேள்

உண்மைப் பொருளா யுலகாளுந் தத்துவந்
திண்மைப் பொருளாய்த் திருவெடுக்கக் - கண்மை
நிறத்தான் றிருநீங்கா நேயன் மருகன்
செறித்தான் சிவசத்தி மைந்து