கண்ணிலே பிறந்து கலி விருத்தம்

கண்ணிலே பிறந்துவந் தடங்குகின்ற காட்சிபோல்
மண்ணிலே பிறந்திருந் தடங்குகின்ற வாழ்க்கைபோல்
பண்ணுளே யிருந்துயர்ந் தடங்குகின்ற  பாட்டைப்போ
லெண்ணிலா பிறந்திருந் தடங்குமுன்னு ளீசனே  

சீறுமாறு கலி விருத்தம்

சீறுமாறு மாறுமாறு சீருதித்த நாதனை
யாறுமாற வன்புலாவ வாகமாவி யாழவே
கூறுமாறு வேதமோத கூற்றொடுங்கக் கூடுமே
யீறுமாறு வானுலாவ வேகமூர்த்தி கையிலே

ஆடி அழல் மீன் கலித்துறை

ஆடி யழன்மீ னறுமாதர் பாலூட்ட வான்றபுக
ழாடி யவனியை யாட்டு மமையப்ப ரீன்றதின  
மாடி மயின்மேல்  வரும்வடி வேலா வரத்தருவே
வாடி வதங்கிடு மன்பர் வளர வகுத்தருளே 

ஆடிக் கிருத்திகை வெண்பா

ஆடிக் கிருத்திகைக் காலயஞ் சென்றுவர
வாடித் துகளாகும் வாட்டமெலாம் - பாடுபுகழ்
நான்முகன் கையெழுத்தை நாதர்க் கழித்தருளு
மான்மருக னன்களிப்பான் வாழ்வு

#வெண்பா

பிறைசூடி பார்ப்பதி வெண்பா

பிறைசூடி பார்ப்பதி பிள்ளை ப்ரணவ
முறையோது மூப்பின் முருகா - குறைவாடும்
பேடி திருந்தப் புகழ்பாடும் பேறளி
யாடிக் கிருத்திகை யன்று
#வெண்பா

மாற்றுதித்த மாருதி கலி விருத்தம்

மாற்றுதித்த மாருதியு மதுரபாடைச் செப்பிடக்
கூற்றொடுங்க முடிவெடுத்த குணவதியுங் கேட்டெழத்
தேற்றளித்த ராமன்விரன் மோதிரத்தைப் பெற்றபின்
மாற்றளித்த மாமணிக்கு வையமேழு மீடதோ

#கலிவிருத்தம்

பார்மகள் மீட்க கட்டளைக் கலித்துறை

பார்மகண் மீட்கப்  பழமறை காக்கப் பொதிமலிந்த
பார்மகண் மீட்கப் பகைவரை வீழ்த்தப் பிரிந்ததிரு
பார்மகண் மீட்கப் பழவரை தாங்கப் பிறப்பெடுத்த
தார்மகன் கேட்கத்  தமிழ்மறை செல்லுந் தலையெனவே

நாரணன் நாமமே கட்டளைக் கலித்துறை

நாரண னாமமே யாவியென் றோதுவர் நன்றிருக்க
நாரண னாமமே யாவியென் றோதுவர் நாணமிலா
நாரண னாமமே யாவியென் றோதுவர் நாமுழல
நாரண னாமமே யாவியென் றோதுவர் நன்றுரையே

-கட்டளைக்கலித்துறை 

வளசை வேங்கட சுப்பிரமணியர் கலி விருத்தம்

மெய்ம்மறந்து மெய்ம்மனுன்றன் மெய்யுகந்து கோவிலில்
பொய்ம்மறைந்து பூசைசெய்யும் போகமேக போகமே
உய்ம்மினென்று ளங்கவர்ந்து யிர்த்தெழுந்த மூர்த்திநீ
வைம்மலர்ந்து  வாழவைக்கும் வளசரத்தின் வேலனே

கலிவிருத்தம் 

திருவடி கலிவிருத்தம்

வானுலாவு மாநதிக்கு மாண்பளித்த மேன்மையுங்
கானுலாவு மாயமானைத் தேடியோடிச் சென்றதும்
பானிலாவின் பகையடங்கப் பைந்நடித்த பாதமே
கூனிலாவும் வாழ்வொடுங்கக் கூற்றினின்று காக்குமே
#கலிவிருத்தம்

எத்தனை ஈன்றிலை கலித்துறை

எத்தனை யீன்றிலை முத்தனை யென்றாலு மீன்றவளி
னத்தனை யின்பமு நித்தமும் பெற்றனண் முத்திதரும்
வித்தினை யன்பெனுஞ் சொத்தினா லாண்டனண் மீதவத்தாற்
சித்தினைப் பெற்றவர் வித்தையைப் பார்த்துத் திகைப்புறவே
-கட்டளைக் கலித்துறை

சேந்தன் விருத்தம்

சேந்தா குமரா முருகா மலைவாழ்
வேந்தா விழிவேற் குறமாதின்

காந்தா சமரா புரிவா ழரசே
காரார் மயிலே றுமைபாலா

சூழ்ந்தா நிரையார் குழலான் மருகா
வாழ்ந்தா லுனையே வுயிராகச்

சார்ந்தா ருனதா ரடியா லடைவார்
தேர்ந்தா யுளொடா றுயர்வீடே

எழு சீர் விருத்தம் 

செவ்வாயில் செவ்வேள் கலி விருத்தம்

மந்திபாயும் வெற்புடைத்த வேங்கடேசன் மருகனே
யிந்துசூடு மெந்தையீச னின்பமுத்து மைந்தனே
தந்திகொம்பை யன்புடைத்த தண்டையேந்து நாதனே
செந்தினாதன் சிந்தையாள சந்தமாள சிந்தையே

 

அரிதிரு மருகா கலி விருத்தம்

அரிதிரு மருகா வருளளி விலகா
குருவரை யிருகா குருகுக வருகா
சிரகிரி முருகா சுரகுல செருகா
வரவரை குழகா வணியயித் கரகா
#கலிவிருத்தம்

பாங்குதேசம் கலி விருத்தம்

பாங்குதேசம் பலவடைந்து பார்திரிந்த போதிலு
மாங்குறைந்தி ருந்துணர்ந்து பட்டறிந்த போதிலு
மோங்கிநின்று வானுமண்ணும் பாங்களந்த நாதனாம்
வேங்கடேசன் வெற்படைந்த மேன்மைதேடு மாவியே
#கலிவிருத்தம்

அரு வுரு கலி விருத்தம்

அருவுரு விருவே றருநிலை கருவே
கருமிட றுறவே கடுவிட மறவே
சிரமலர் நிலவே திருநதி யரவே
தருநிழற் குருவே தனையளி தருவே
#கலிவிருத்தம்

குரு பூர்ணிமா வெண்பா

குருவரு ளொன்றே திருவருள் கூட்டு
மிரவிரு ணீக்கு மிரவி - யருமருந்
தீதென  வீதா னிறைவன் முறையொழுகி
நீதா னிறைய மதி
#வெண்பா

கலியின் பெருவலி கலி விருத்தம்

கலியின் பெருவலீ களையு பெருவலீ
மலையி னொருவிலீ மதனை யுருவிலீ
கலையங் கரவிலீ கருணை கரவிலீ
வலையின் விடிதலீ வனிதை யகவிலீ
#கலிவிருத்தம்

மாதவன் மாலவன் கலி விருத்தம்

மாதவன் மாலவன்  வாசவன் வேதவன்
போதவன் தாதவன் தூதவன் வாதவன்
சேதவன் சாதவன் கோதிலா வாதவன்
ஓதவன் யாதவன் சூதவன் யாதுமே

#கலிவிருத்தம்

 

மதி கதிர் உருளா

மதிகதி ருருளா மணிரத வருளா
மதிகதி தெருளா மறைமுதற் பொருளா
சதிபதி வெருளா செவியொரு சுருளா
பதிதுதி யருளா பணிமதி மருளா
#கலிவிருத்தம்

பார்ப்பொடுக்கும் அன்னை அன்பு கலி விருத்தம்

பார்ப்பொடுக்கு மன்னையன்பு பார்கொடுக்க வீடதோ
வார்பரிக்கும் வாழ்வுகந்து போர்தொடுக்கு மூட(ர்)காள்
கூர்படுத்த  சிந்தைநன்று  சீர்படுத்த பண்பையும்
நேர்படுத்து மன்னவன்பி னீர்ப்பெடுத்து வாழியே  
#கலிவிருத்தம்

இலக்குமி கலி விருத்தம்

நீர்துயின்ற நேமியானி னெஞ்சகத்தில் வாழ்ந்திடு
நீர்பிறந்த நேரிலாளின் நின்றகோல தாளிணை
நீர்சொரிந்து பூசைசெய்யுங் கார்மலிந்த வானைதன்
பார்பிறந்த வாழ்வுயர்த்தும் பார்க்கவிந்த காட்சியே

#கலிவிருத்தம்

களிறு உரியனே கலி விருத்தம்

களிறி னுரியனே கழக முதல்வனே
யொளிறு மலையனே யுயிரி லுறைவனே
தளிர மடியனே தவசி முதல்வனே
வளர வறியனை வகைசெ யபயனே
#கலிவிருத்தம்

அறிதுயிலரியா வஞ்சித்துறை

அறிதுயிலரியா விரிசடையிறையா
குறமகளிறையா குழலழகுமையா
வறுவழியுனதா வருவுருவகையா
சிறைபிணிவிடியா பிறைமதியழகா   

கண்ணன் கலிவிருத்தம்

கள்வனென்று கோகுலத்திற் கண்ணனாக வந்தனை
புள்வனன்று வாய்பிளந்து பூதனையைச் செற்றனை
கொள்வனென்று போர்தொடுத்த கௌரவர்கண் மாய்த்தனை
யுள்வனென்று முன்னதாவுன் மேன்மையான கீர்த்தியே 

அடியர் அருகனே கலி விருத்தம்

அடியர ருகனே யமர ரரசனே
நெடியன் வலவனே நிகரில் புகழனே
துடியை யுடையனே துரிய நிலையனே
விடமு மமுதமே விமலன் பருகவே 

ஒருவரை சிலையா

ஒருவரை சிலையா வுருவரு நிலையா
புரமெரி நகையா புனலணி சிகையா
சிரமுறை பணியா சிதமுறை பணியா
குருவரு குமரா குணமளி பரமா  

தகனம் பயிலிடம் கலி விருத்தம்

தகனம் பயிலிடந் தளர்வில் புரிநடம்
ககனம் விரிசடை கனக வரையிடை
குகனங் கரிமுகன் குறையி லுமையுடன்
றிகழும் புரமெரி விமல னடிபணி
#கலிவிருத்தம்

 

புனல் அணி சடையன் கலி விருத்தம்

தனனன தனனா  

புனலணி சடையா பொடியணி விடையா
அனலுடை விழியா லழகனு(ம்) பொடியா
தனிநடை யரையா தவவுமை யடையா
பனியுறை மலையா பதமளி நிலையா
#கலிவிருத்தம்

பிறப்பிறப்பு வெண்பா

பிறப்பிறப்பைப் போக்கும் பிரானிடஞ் சென்று
பிறபிறப்பை வேண்டிப் பிறழா - திறப்பிறப்பைத்
தந்தருளுஞ் சீரலைவாய் நாதன் பதம்பணிந்து
வெந்தழல் வேலை விடு

செவ்வாயிற் செவ்வேள் வெண்பா

புதிதாய்ப் பிறந்து  புலமை பெறவே
கதிதா கருணைக் கடலே - நதிபோல்
கவிதை நயமாய் வரவே மதிதா
வவி(த்)தை யழிக்கு மழகு 

வேல் வெண்பா

வேன்முகங் கண்டுய்ய வீண்வினை வெந்துபோங்
கான்முகங் காதலித்த கந்தையன் பான்மையை
வான்முகம் வல்லரக்கர் மாள வமர்புரிந்த
கோன்முகங் கொண்டுவருங் கட்கு  

 

பெரியாழ்வார் வெண்பா

அம்மானுக் கம்மானா யம்மாவிற் கம்மாவாய்
பெம்மாற்குப் பல்லாண்டு பாட்டளித்தா  னம்மானை
மீதேறி  வீதியுலா வந்தகணம் விட்டுசித்தன்
வாதேறாய் வெற்றிநடை போட்டு  

திருவாழியாழ்வான் ஆசிரிய விருத்தம்

 

பகலையிரவுசெய் கொடிய முதலைகொல்

பதறியவுணனின் பொழிய குருதிசெய்

சிகரனுனிவிரல் பரம னணிவகை

சிதறவுடறலை யசுர னமுதுகொள்

பகருசிசுதலை பணிய குருசபை

பழையமலவகை யொழிய வுதவிசெய்

பகரதமிழிசை யுதிதி ருமழிசை

பழகுதமிழிசெய் திகிரி பணிவனே

அறு சீர் ஆசிரிய விருத்தம் 

 

சுதர்ஷன விருத்தம்

 மலையெடுத்து மழைதடுத்த மாயவாயன் கையணி
        மதிமயக்கக் கதிர்மறைக்கு மாயமாக வாதினி
னிலையிழந்த வானைகாக்க நொடிவிரைந்து முதலையை
        நிலைகுலைத்த நாரணன்ற னிகரிலாத நேமியே
சிலைகுனித்த சீதைநாதன் சீர்த்திபேசும் பாணமாய்
      சினமெடுத்துத் தூண்பிறந்த சிங்கவேளி னுகிருமா
யலைகடைந்த மாயவன்றன் ரூபமான மூர்த்தியே
     யகமகிழ்ந்து வாழ்வுவீடு மளியளிப்பா யன்பர்க்கே

எண்சீர் ஆசிரிய விருத்தம் 

கருநீல வண்ணன் கட்டளைக் கலித்துறை

கருநீல வண்ணன் கடந்தேர வீடு கனிந்தளித்த
தருநீல வண்ணன் றருமந் தழைக்கத் தரணிவருஞ்
செருமாள வண்ணன் றிறமிகு பார்த்த னிலையுயர
குருநாத வண்ணன் கனியிலு முள்ளான் கருவெனவே
#கட்டளைக்கலித்துறை

திருவடிக் கலித்துறை

அருந்துங்கா றீண்ட வகலிகை பெற்றா ளழகுருவ
மருந்துங்கா றீண்ட வரச னடைந்தா னழியாப்புக
ழருந்துங்கா றீண்ட வடங்கா நதியு மகிலம்வர
வருந்துங்கா றீண்ட லடியா ரணிவா ரகத்தழகே

கட்டளைக் கலித்துறை 

செவ்வாயிற் செவ்வேள் வெண்பா

காவடி தூக்கக் கடும்பிணி போமுருகன்

காவடி தூக்கக் கடும்பிணி போமருகிச்

சேவடி தூக்கிச் சிரங்குளிர வைத்தெம்மைப்

பாவடி தூக்கப் பணி

#வெண்பா

 

கந்தன் கலி விருத்தம்

 

கருமநிறைவுற பலனுமுனதல வுணர வுரையுரைத்த

தருமநிலைபெற கொடுமைநிறைவுற வருவ னுகவுகமா

யருமைமருகனே சடையிலணிமதி புனையும் வெளிவிடையார்

பிரணவவுரையுரை குமரகுருபர தருக தமிழழகே  

தணிகையான் கலி விருத்தம்

 

சேவலங் கொடியோன் சினமடங்கு தணிகைமலைக்

காவலம் வரவே காத்தருள்வான் கந்தகுரு

பாவலம் பெறவே பல்லறிவும் போதுணர்த்தி

நாவலந் தருவா னற்றமிழ்வே ணாயகனே

#கலிவிருத்தம் 

 

புரி கலிப்பா

புரிவடிவப் புரிநின்ற புரிசங்குச் சக்கரத்தான்
வரிவடிவம் வருமுன்னே  கடல்கடைந்த திருவுடையா
னரிவடிவ மெடுத்தவுணன் மடியமர்த்தி யுடல்பிளந்தான்
பரிவடிவச் சிரங்கொண்டான் பதம்பணியக்   கவிவருமே  

தரவு கொச்சகக் #கலிப்பா

இறையிரை சிந்து

இறையின்றி யில்லையிரை -யற்றே
யிரையின்றி யில்லையிறை 

நிறையின்றி யில்லைகுறை - யற்றே
குறையின்றி யில்லைநிறை

கரையின்றி யில்லைகட - லற்றே
கடலின்றி யில்லைகரை

பரமின்றி யில்லைபணி - யற்றே
பணிவின்றி யில்லைபரம்

இறை யிரை சிலேடை வெண்பா

சுட்டாவி தட்டிட்டுச் சாம்பாரிற் றோய்த்தெடுக்கச்
சட்டினிக்கும் பொங்கல் பொருதுவக்கு - மிட்டவுண
வாழ்ந்திருக்கப் பத்தனுளத் தாழ்குரலை மெய்ப்பிக்கப்
போழ்துவந் தூண்பிளந்தான் போக்கு

திருக்கடிகை விருத்தம்

 யோகம ருருவில் வீறிரு மரியை
    வேதனை தீர  வரம்வேண்டி
யோகிகள் பணியு மாளரி யிறையை
     யோரெழில் கடிகை மலையேறி

தேகமு மொளிரத் தீவினை யொழியச் 
    சீரக மிளிரத் தொழுவோர்க
டீவினை யெரிய வாலம ரடியன்
    ராமனி னாம நிதமேத்து

மாகம மறிய  வாரண  மறிய  
    வேரண முறையே பயின்றோனை
யாதவ னழகு வானுறை கனியா
    யாசையி லுணவே முயன்றோனை

மோகமு மொழிய மோனமு மொளிர
    மூதுல குறையு  முனிவோனின்  
காதலி லுருகிக் கடிமல ரணவித்  
     தாளிணை முதலிற் பணிவாரே 

குருவார குருமூர்த்தி வெண்பா

ஆறகத்தி னின்ற வருணா சலன்மைந்த
னூறகற்று நாம முணர்ந்துணர்ந் - தீறகத்தும்
பாரகத்தும் பேறளிக்கும் பால குருமூர்த்தி
யேரகத் தீசனை யேத்து

#வெண்பா 

 

வைணவ ஆசாரியர்கள் வெண்பா

நம்பெருமா ணம்மாழ்வார் நஞ்சீயர் நம்பிள்ளை
யெம்பெருமா னார்வழி யேற்றுயர்வா  - யம்புவியி
லிப்பிறவி யீடேற்ற வேறுண்டோ நல்லாறு
தப்பாமல் சார்வாய் பணிந்து
#வெண்பா

 

முருகன் கலிவிருத்தம்

 

தேரழுந்தப் பார்த்தனுயிர் போர்களத்திற் காத்தநல்

காரணிந்த நீலமேனி கண்ணனாரின் மருகநின்

சூரொடுங்க நீலமயில் சேவலென மாற்றிய

சீரணிந்த தார்மார்பன் சிந்தையாள சிந்தையே

#கலிவிருத்தம் 

 

ஆண்டாள் கலிவிருத்தம்

 பூவணிந்த பாவைக்குப் பல்வளைகள் சூட்டியே 

பாவுகந்து போற்றிசைக்கப் பாற்கடலிற் கேட்குமே 

காவுகந்த சுந்தரன்றன் காக்குமருட் கிட்டுமே

நாவுகந்து நல்லாண்டா ணாமமோது நெஞ்சமே

 

#கலிவிருத்தம்

 

செவ்வாயிற் செவ்வேள் கட்டளைக் கலித்துறை

அம்மானை யேந்து மனல்விழி யார்தந்த வாறுமுகா
வம்மானைத் தேடி யருங்கான மோடு மணன்மருகா
வம்மானைத் தேடி யருங்கான மோடு மணவழகா
வம்மானைப் போலே யருங்காதற் கொண்டா யடியவர்க்கே